Нам славіць гэты дзень вякамі

…Іх засталося няшмат ­ удзельнікаў Вялікай Айчыннай вайны, якія сёння пражываюць на тэрыторыі нашага раёна і змаглі сустрэць 72­ую гадавіну Вялікай Перамогі. Яны выжылі ў той страшнай вайне, адбудоўвалі з папялішчаў гарады і вёскі, нястомна працавалі на карысць дзяржавы і будучых пакаленняў, паказваючы ўжо іншыя – працоўныя подзвігі. І вось яны адыходзяць, падуладныя законам часу і пражытых гадоў. Яны і іх вялікі подзвіг, які штогод збірае нас у памятную дату 9 Мая, каб у чарговы раз сказаць усім – і жывым, і памерлым ветэранам – вялікі дзякуй за Перамогу, за свабоду, за жыццё.

Менавіта са слоў падзякі і пачаў сваё выступленне на ўрачыстым мітынгу, прысвечаным Дню Вялікай Перамогі, старшыня раённага выканаўчага камітэта А.М. Ба­бічаў.

­ Сёння мы адзначаем 72­ую гадавіну Перамогі савецкага народа ў Вялікай Айчыннай вайне, ­ адзначыў ён. – Гэтая дата навечна ўпісана ў гісторыю нашай краіны. Беларускі народ, як ніхто іншы, ведае цану міру і вышэй за ўсё ставіць гонар і свабоду сваёй Айчыны. Кожная беларуская сям’я адчула цяжар вайны на сабе.

Бярэзіншчына тры гады знаходзілася пад нямецка­фашысцкай акупацыяй. У раёне за     гэты    час     цалкам      спалілі  22 вёскі,  прычым  Баравіно і Краснае разам з жыхарамі. За гады вайны колькасць жыхароў раёна скарацілася на 16 тысяч чалавек – амаль на чвэрць ад даваеннай колькасці. Толькі бярэзінскае гета забрала жыцці звыш 900 чалавек.

З першых дзён акупацыі раёна яго насельніцтва ўзнялося на барацьбу з ворагам. У памяці жыхароў Бярэзіншчыны засталіся партызанскія сувязныя, ураджэнкі раёна, якія аддалі жыццё за свабоду нашай зямлі­Вера Лясных і Марыя Рамановіч. Залатымі літарамі ў гісторыю ўпісаны імёны Герояў Савецкага Саюза – нашых землякоў Сцяпана Аляшкевіча і Іосіфа Свідзінскага.

Аб гераізме і мужнасці воінаў і мірных жыхароў Бярэзінскага раёна сведчаць 110 помнікаў, з якіх 76 воінскіх пахаванняў.

Дзень Перамогі – гэта перш за ўсё свята ў імя міру і будучых пакаленняў, для якіх і абараняліся нашы рубяжы, здабывалася свабода. Ад імя маладога пакалення да прысутных   звярнуўся   вучань   СШ №2  г. Беразіно,   прызёр  абласной алімпіяды па фізіцы Макар Шпакоўскі. Пранікнёна і шчыра гучалі яго словы:

­ Памяць – гэта не проста асаблівасць чалавечай свядомасці. Памяць вучыць і заклікае, дае сілу і веру. Вось чаму мы, маладое пакаленне, так свята шануем і памятаем подзвігі тых, хто не шкадаваў ні сіл, ні самога жыцця ў імя Вялікай Перамогі. Май заўсёды будзе асацыіравацца ў нашых сэрцах з вясной і працай, вясной і мірам, вясной і перамогай. 9 Мая – гэта сапраўды народнае свята, поўнае радасці і смутку.

Традыцыйна прысутныя ўшанавалі памяць удзельнікаў Вялікай Айчыннай вайны хвілінай маўчання. Гулкім рэхам разнёсся па наваколлі аўтаматны залп. Да падножжа помніка загінуўшым землякам ускладаюцца вянкі і жывыя кветкі ад раённага выканаўчага камітэта і раённага Савета дэпутатаў, ад прадпрыемстваў і арганізацый горада, ад грамадскіх аб’яднанняў, палі­тычных партый, моладзі і рэлігійных арганізацый, ад савета ветэранаў. Вечная слава загінуўшым і ўсім, хто не дажыў да гэтага светлага дня!

Далейшыя святочныя мерапрыемствы працягваліся традыцыйна   на    гарадскім   стадыёне.   І хаця надвор’е не вельмі спрыяла ў гэты дзень доўгаму адпачынку на свежым паветры, людзі не спяшаліся разыходзіцца па дамах. Тым больш, што тут былі наладжаны гандаль, арганізаваны шматлікія гульні для дзяцей, выставы­продажы вырабаў народных рамёстваў. А вялікі святочны канцэрт, падрыхтаваны дзіцячай школай мастацтваў і раённым цэнтрам культуры, ажыўляў у памяці мелодыі ваеннай тэматыкі і радаваў танцавальнымі ну­марамі. Свята, сапраўды, атрымалася сямейным і шчырым.

Завяршэннем яго стала акцыя “Спяём  “Дзень Перамогі” разам”, праведзеная на цэнтральнай плошчы горада ў час маладзёжнай дыскатэкі.

Анатоль ПАЛЫНСКІ.

Фота Алены Громавай.