Сёння — рэкорды, а заўтра — бяспека

У мінулую пятніцу начальнік аддзела Дзяржаўтаінспекцыі Бярэзінскага РАУС Дзмітрый Васільевіч Гайдук у актавай зале пачатковай школы ўручаў дзятве палкі для сэлфі і навушнікі. Рабіў ён гэта са шчырым сэрцам, бо ўпэўнены, што навамодныя прылады трапілі ў надзейныя дзіцячыя рукі і ніколі не стануць прычынай няшчасцяў на дарозе. Так раённы аддзел Дзяржаўтаінспекцыі і ўпраўленне па адукацыі, спорце і турызме райвыканкама адзначыла пераможцаў Алімпіяды па Правілах дарожнага руху. 

Згодна з умовамі конкурсу, у склад каманды знаўцаў правілаў увайшлі па адным удзельніку з ліку вучняў 5, 6 і 7 класаў, якім неабходна было справіцца з рашэннем двух білетаў, кожны па дзесяць задач. На выкананне задання адводзілася 10 хвілін – з разліку 1 хвіліна – 1 пытанне.
Аднак гэтага часу аказалася больш чым дастаткова для каманды ДУА «Пагосцкі ВПК дзіцячы садок-сярэдняя школа», якая стала пераможцай у камандным заліку. Члены журы з ліку работнікаў упраўлення па адукацыі, спорце і турызме райвыканкама і супрацоўнікаў Дзяржаўтаінспекцыі не паспелі нічога зразумець, як хлапечая пагосцкая каманда ў складзе Валерыя Шэмета, Арцёма Кірыенкі і Арцёма Букатага выканала ўсе заданні. Яна без памылак справілася з задачамі за 12 секунд! Другое месца заняла каманда Бярэзінскай гімназіі, а трэцяй стала каманда Любушанскай школы.
Такі расклад пераможцаў абумовілі вынікі індывідуальнага першынства. Тут, бясспрэчна, абсалютным лідарам стаў вучань 7 класа ДУА «Пагосцкі ВПК дзіцячы садок-сярэдняя школа» Валерый Шэмет. На гэты раз пагосцкі рэкорд выканання заданняў — 25 секунд і ніводнай памылкі. Другое месца таксама ў вучня 6 класа Пагосцкай школы Арцёма Кірыенкі. Трэцюю пазіцыю заняў прадстаўнік ДУА «Брадзецкі ВПК дзіцячы садок – сярэдняя школа» Захар Кніга.
Вызначыўся прадстаўнік Брадзецкай школы і ў творчым конкурсе «Дзеці Мінскай вобласці — за дарогі без аварый». Намаляваны ім плакат прынёс навучальнай установе дыплом ІІ ступені. А вось дыплом І ступені атрымала каманда ДУА «Ушанскі ВПК дзіцячы садок-сярэдняя школа», а ІІІ — каманда ДУА «Сярэдняя школа №3 горада Беразіно».
— Вынікі алімпіяды па Правілах дарожнага руху прыемна радуюць, — зазначыў, падводзячы вынікі мерапрыемства, Дзмітрый Васільевіч, — паказваюць выдатныя веды і рэкордны час рашэння задач. Спадзяюся, атрыманая тэарэтычная падрыхтоўка знойдзе практычны працяг: яны стануць законапаслухмянымі ўдзельнікамі дарожнага руху. Ды і сёння плён намаганняў у павышэнні ведаў правільных паводзінаў на дарозе відавочны – не зарэгістравана здарэнняў па віне альбо з удзелам дзяцей.
— Выдатнае веданне Правілаў дарожнага руху не стане лішнім для дзяцей у дарослым жыцці, а бездакорнае іх выкананне пазбавіць ад няшчасцяў і калецтваў на дарозе, — удакладніла галоўны спецыяліст упраў-лення па адукацыі, спорце і турызме райвыканкама Ірына Аляксандраўна Зябко. — У школах рэгулярна вядуцца заняткі па Правілах дарожнага руху, з дзецьмі працуюць вопытныя і адказныя педагогі.
Застаецца дадаць, што Алімпіяда па правілах дарожнага руху праводзілася сёлета ў 14 раз. Згодна з яе ўмовамі, каманда-пераможца раённага конкурсу адправіцца адстойваць гонар на абласное мерапрыемства. Такое права атрымала каманда Пагосцкай СШ пад кіраўніцтвам Наталлі Іванаўны Кісель. Пажадаем поспеху пагосцкім знаўцам!

Мілана ТРАПЯНОК.
Фота Алены ГРОМАВАЙ.

Добавить комментарий

Ваш e-mail не будет опубликован. Обязательные поля помечены *