– Мяне, як настаўніка гісторыі, педагога, і сакратара пярвічнай арганізацыі БРСМ, у першую чаргу зацікавілі ў праекце абноўленай Канстытуцыі такія новаўвядзенні, як захаванне гістарычнай памяці і накірунак на патрыятычнае выхаванне. І гэта вельмі правільна, таму што нельга эфектыўна будаваць будучыню краіны, страціўшы памяць пра мінулае. Ні для каго не сакрэт, колькі разоў розныя “спецыялісты” хацелі перапісаць гісторыю перамогі нашага народа ў гады Вялікай Айчыннай вайны, падаць яе ў скажоным варыянце.

І праект абноўленай Канстытуцыі забяспечвае захаванасць нашай сапраўднай гісторыі, а клопат аб патрыятычным выхаванні дазволіць укараніць гэтыя патрэбныя веды ў свядомасці падрастаючага пакалення. Да таго ж асобна радуе, што на заканадаўчым узроўні забяспечваецца прадухіленне распаўсюджвання ідэй нацызму, неанацызму і адпаведных разбуральных тэндэнцый. Таму 27 лютага я абавязкова пайду на рэферэндум і прагаласую за Асноўны Закон – гарант мірнага неба над нашай краінай.