– Падлеткавы алкагалізм вельмі небяспечны па многіх прычынах. І найпершая з іх – несфарміраванасць арганізма маладога чалавека, з-за чаго спіртное адмоўна адбіваецца на далейшым развіцці чалавека і яго ўнутраных органаў, а таксама псіхіцы.

Найчасцей падлеткавы алкагалізм узнікае на фоне ўзаемаадносін у сям’і, калі там праяўляюцца негатыўныя міжасабовыя адносіны, насілле, непаразуменне, празмерная апека з боку бацькоў. Другі вельмі важны фактар – адносіны з сябрамі і імкненне не адставаць ад іх, перайманне звычак і паводзін сваіх куміраў па кампаніі. Акрамя таго, ужыванне спіртнога, па словах саміх маладых людзей, дае магчымасць няўпэўненым у сабе падлеткам быць смялейшымі, у тым ліку і ў паводзінах з супрацьлеглым полам, хоць гэта зусім не так. Адмоўным фактарам ужывання спіртнога ў падлеткавым узросце з’яўляецца і хуткае да яго прывыканне, якое перарастае затым і ў залежнасць.

Таму вельмі важна прадухіліць прадстаўнікоў падрастаючага пакалення ад ужывання алкаголю, весці з гэтай з’явай барацьбу як у школах, так і ў грамадскім асяроддзі. А прыклад (і толькі станоўчы!) паказваць сваімі паводзінамі павінны бацькі, бо іменна яны з’яўляюцца самымі галоўнымі ўзорамі для пераймання.

Анатоль ПАЛЫНСКІ.

Фота аўтара.