Цырымонія ўзнагароджвання адбылася 2 снежня ў Маскве ў Зале пазнання Дабра і Зла “Яблоко” Зураба Цэрэтэлі (Расійская акадэмія мастацтваў). Тут Яўгенію Паўлавічу былі ўручаны дыплом і падарункі. 

Міжнародная прэмія “Філантроп” зарэгістравана яшчэ ў 1990-м годзе. Узнагароджванне адбываецца раз у два гады. За ўвесь час існавання прэміі, у ёй прынялі ўдзел шмат тысяч людзей з 36 краін свету.

На ўрачыстай цырымоніі прагучалі вітальныя словы Презідэнта Рэспублікі Беларусь Аляксандра Лукашэнка і Прэзідэнта Расійскай Федэрацыі Уладзіміра Пуціна.

Сёння гэты маштабны праект дапамагае раскрыцца многім дараванням і стаў важным інструментам падтрымкі талентаў. У Беларусі пошукам і прадстаўленнем прэтэндэнтаў на атрыманне прэміі займаецца грамадскае аб’яднанне “Беларускае таварыства інвалідаў”.

Мастацтва не мае бар’ераў і яднае людзей, менавіта такі пасыл прагучаў у час мерапрыемства.

– Я сам паляўнічы і гэтая акалічнасць увасабляецца ў маіх драўляных скульптурах, – патлумачыў Яўген Паўлавіч, дэманструючы свае вырабы на ўрачыстасці. – Тут і дзік, і паляўнічы. Яшчэ я і грыбнік, таму вось у адпаведнай рабоце маецца казачны матыў – бацька з сынам рэжуць вялікі цуда-грыб. Тут на мерапрыемстве прысутнічаюць вельмі моцныя майстры, работы якіх могуць здзівіць нават разьбяроў са стажам і вопытам, у іх часам варта павучыцца.

Таленавіты чалавек таленавіты ва ўсім, гэта вядомая ісціна знаходзіць пацвярджэнне ў кожнай новай рабоце ў выкананні нашага Народнага майстра. Дарэчы, за плячыма ў Яўгенія Осіпава 38 гадоў педагагічнага стажу, ён выкладаў фізіку, матэматыку, інфарматыку. Працаваў у Ляжынскай, а потым Лагаўской школах. Быў 10 гадоў завучам і пасля 10 гадоў дырэктарам установы адукацыі. Пэўны час вёў і фотагурток. Творчасці і таленту гэтаму чалавеку заўсёды было не займаць. І вось калі заняўся разьбой па дрэве, спачатку лічыў, што гэта захапленне. Аднак захапленне неўпрыкмет стала жыццём.

За чвэрць веку ў Яўгенія Осіпава сабраўся вялікі стос дыпломаў, грамат і падзяк за ўдзел у разнастайных фестывалях і конкурсах. Усе яны сведчанне яго творчых пошукаў і перамог. Дыплом лаўрэата вядомай Міжнароднай прэміі з’яўляецца яскравым пацвярджэннем і прызнаннем яго таленту на міжнародным узроўні.

Першыя работы ў выглядзе драўляных крэслаў, аздобленых мастацкай разьбой, выстаўляліся на лакацыях установы культуры на гарадскіх святах яшчэ ў 2000-х, а потым «паехалі» на падарунак у Маскву. А вось захапленне драўлянымі лыжкамі заняло цэлы культурна-мастацкі накірунак у яго творчым жыцці. І сёння большасць экспанатаў адзінага ў краіне музея-пакоя драўлянай лыжкі ў Бярэзінскім раённым цэнтры рамёстваў маюць аўтарства Яўгенія Паўлавіча. Ну а пра самую вялікую драўляную “Лыжку-цмока”, якая ўпрыгожвае цэнтр рамёстваў, ведаюць бадай усе жыхары раёна.

Герой матэрыяла выказвае шчырую падзяку старшыні Бярэзінскай раённай арганізацыі грамадскага аб’яднання “Беларускае таварыства інвалідаў” Васілію Шалупенка, дырэктару Бярэзінскага ТЦСАН Алене Жолудзевай і ўсім, хто прыняў удзел у падрыхтоўцы да паездкі на мерапрыемства.

Віншуем нашага Народнага майстра мастацкай разьбы па дрэве, лаўрэата і проста чулага, шчырага, добрасардэчнага чалавека з гэтай значнай падзеяй і жадаем далейшых плённых творчых пошукаў і здабыткаў, каб рука была заўжды цвёрдай і разец у ёй не губляў вастрыні!

Аляксандр БЫЧКОЎСКІ.
Фота прадастаўлена героем матэрыялу.