З дапамогай гульняў і загадак дзецям нагадалі важную ісціну: жыццё – самае лепшае і цэннае, што ў нас ёсць. А зберагчы яго ад небяспекі – няцяжка: трэба  быць пільнымі і бездакорна выконваць правілы ўласнай бяспекі, прадугледжваць бяду і слухацца дарослых.

Думаем, для вас будуць цікавымі меркаванні нашых юных экспертаў, выхаванцаў дзіцячага сада №4 горада Беразіно. Яны падзяліліся своім меркаваннем наконт бяспечных паводзінаў зімой.

Марыя Шмарлоўская:

«Падчас гульняў на вуліцы дзеці могуць змерзнуць і захварэць. Таму ў моцны мароз доўга гуляць у двары нельга. На слізкай дарозе можна ўпасці і зламаць нагу. Каб пакатацца на санках або цюбінгу, выбірайце не вельмі крутую горку, без дрэў і слупоў. А пакатацца на каньках бяспечна можна на спецыяльным катку, такі ёсць у нашым горадзе».

Яўген Асадчы:

«Дзецям адным нельга выходзіць на зімой на возера ці рэчку, нават падыходзіць да рэчкі я б не раіў. Праваліцца пад лёд – гэта вельмі страшна і небяспечна для жыцця! Хадзіць на рэчку можна толькі з дарослымі і ў спецыяльным выратавальным жылеце».

Да парад нашых экспертаў можна дадаць толькі рэкамендацыі для бацькоў: не пакідайце малалетніх дзяцей без нагляду, штодня нагадвайце ім правілы пажарнай, дарожнай бяспекі. Будзьце прыкладам бяспечных паводзінаў для свайго дзіцяці!