- Знутры пафарбавалі будынак, каб было прыемна воку, - расказвае загадчыца ФАПа Вольга Макарэвіч.

Так, цяпер унутры ўсталяваўся належны парадак. Будынак патынкаваны, дзе трэба і пафарбаваны, прыемна воку зачапіцца.

Працаўнікі гаспадаркі “Першамайскі” дапамаглі з агароджай – парамантавалі яе.  

- Дзякуй ім за гэта, малайцы, - зазначае Вольга. – У спякотную пару ўборачнай, вядомая справа, працавітыя рукі патрэбны і ў полі, і на мехдвары, аднак знайшлі час, каб дапамагчы нам.

Усе астатнія работы па добразпарадкаванні ФАПа, а гэта і заліўка атмосткі, прывядзенне ў належны выгляд шыферу на гаспадарчай пабудове, пафарбавалі сцены выканала рабочая брыгада Бярэзінскай ЦРБ.  

Пасля рамонту настала самая пара ўпрыгожваць тэрыторыю зяленівам. Клумбы пад кветкі перакапвала і рыхтавала санітарка Марына Пенкрат. Трэба дадаць, на клумбах тут заўсёды была прыгажосць, і заслуга ў гэтым медыкаў ФАПа.

А рамонт тут пакуль да канца не завершаны, трэба падрамантаваць столь, якая працякае ў санітарным пакоі, варта давесці да ладу качагарку.

Папрыгажэў ФАП. І, вядома ж, сам аграгарадок. Раённыя Дажынкі – самая нагода не толькі навесці парадак, але і ўпрыгожыць населены пункт, каб і гаспадарам не было сорамна, і госці якслед парадаваліся і адпачылі на будучым свяце.

Мікуліцкі ФАП абслугоўвае 8 населеных пунктаў у радыюсе пяці кіламетраў: Мікулічы, Лучкі, Заямнае, Чырвоная Паляна, Чырвоны Сад, Сасновае балота, Смалярня і Крынкі. Насельніцтва на ўліку 359 чалавек, у тым ліку 54 дзіцяці, з іх да года 2 дзетак, яшчэ чакаецца паяўленне 4-х немаўлят. Урач і педыятр прыязжаюць на прыём рэгулярна два разы на месяц. За дзень у ФАП наведваецца парою па 20 чалавек і нават больш.

Загадчыца Вольга Макарэвіч працуе тут ужо сем гадоў з улікам дэкрэтнага адпачынку. Закончыла ў свой час Беларускі медыцынскі каледж у Мінску.

Аляксандр БЫЧКОЎСКІ.

Фота аўтара.