Наведаліся яны і да нашай матулі Паліны Майсееўны Шаўцовай, якая пражывае разам з намі на вуліцы Першамайскай горада Беразіно. Жанчына з’яўляецца малалетнім вязнем дзіцячага канцлагера Азарычы.

Нялёгка матулі давялося ў тых жудасных умовах, дзе на кожным кроку і кожны дзень кожнага вязня падпільноўвала смерць. Глыбокую душэўную рану захавала яна да гэтых дзён. Нечалавечыя ўмовы ўтрымання падарвалі і яе здароўе.

Прыезд да Паліны Майсееўны і да нас, яе родных, шаноўных гасцей стаў прыемным момантам, поўным пазітыўнага святочнага настрою.

Андрэй Валянцінавіч асабіста пацікавіўся ў маці не толькі станам яе здароўя, але і праблемамі, якія існуюць у нас, прапанаваў дапамогу ў іх вырашэнні. За кубкам гарбаты вялася непрымусовая шчырая гутарка на жыццёвыя тэмы, маці дзялілася сваімі горкімі ўспамінамі і дзякавала за аказваемую ёй увагу.

Мы, яе дзеці, таксама вельмі ўдзячны ўсім, хто ўдзельнічаў у гэтым візіце, за ўважлівыя і спагадлівыя адносіны да ветэранаў вайны і малалетніх вязняў канцлагераў. Дай Бог ім усім здароўя і дабра.

Сям’я ЛАПЦЁНАК,
г. Беразіно.