У гульневым формаце, з прымяненнем розных форм работы, мы стукаем у дзіцячыя сэрцы і розум, каб зберагчы дзяцей ад неабдуманных учынкаў і небяспечных гульняў. Мультфільмы Міністэрства па надзвычайных сітуацыях Беларусі – добрая дапамога ў навучанні.

Інспектар прапаганды Бярэзінскага райаддзела па надзвычайных сітуацыях Вольга Ермакова расказвае:

– За летні час у раёне здарыўся адзін пажар з-за свавольства дзяцей з агнем. У весцы Жарамец дзеці 11-ці і 12-ці гадоў, што прыехалі са сталіцы адпачываць да родных, падпалілі анучу і кінулі яе на смецце ля дому, у якія даўно ніхто не жыў. Пазней распачаўся пажар. Дзеці прызналіся, што не мелі намеру падпаліць дом, аднак жа з-за ўласнай неабачлівасці пакінулі побач тлеючую анучу… Ніхто не пацярпеў, аднак ў жыцці бывае і інакш: гульні з запалкамі ў хаце, да прыкладу, могуць прывесці да пажару і гібелі дзіцяці. Падобныя выпадкі яшчэ раз павінны пераканаць дарослых: дзяцей нельга пакідаць без нагляду, у доме неабходна прыбраць з зоны доступа запалкі. Сачыце, каб малыя дзеці самі не карысталіся электрычнымі прыборамі і не маглі самастойна адчыніць вакно.

Устаноўка пажарнага апавяшчальніка ў кожным пакоі вашага дому – тая важная мера, якая выратуе людзей пры пажары. Прыбор падасць сігнал пры задымленні і чалавек будзе мець магчымасць своечасова зрэагаваць: выбегчы на вуліцу, выратаваць родных людзей і пазваніць па нумары 112, ліквідаваць невялікі агонь уласнымі сіламі.

Беражыце жылле ад пажару і не пакідайце малых дзяцей сам-насам з іх заняткамі: гэтыя заняткі далека не заўседы бываюць карыснымі і бяспечнымі.