Адразу шэсць даследчых работ выйшлі ў фінал спаборніцтваў. А гэта было вельмі і вельмі няпроста, бо на абласны этап 195 вучняў прадставілі 175 работ даследчага характару ў намінацыях "Бюро знаходак", "Мая радзіма - Беларусь", "Гуманітарныя веды", Дзіця і прырода" , "Незвычайнае ў звычайным"

- Калі я даведалася аб гэтым, - прызнаецца намеснік начальніка ўпраўлення па адукацыі, спорце і турызме райвыканкама Ала Петруковіч, - у рэшце рэшт даследчы талент нашых дзяцей быў заўважаны, а намаганні выхавальнікаў і настаўнікаў мелі свой плён. Думаю, што гэты бліскучы поспех стане пуцяводнай зоркай на шляху да будучых яшчэ больш значных перамог.

У ганаровым спісе лепшых даследчыкаў Давід Смалякоў з дзіцячага садка № 4, Ульяна Богнат з ДУА "Паплаўскі ВПК дзіцячы садок - сярэдняя школа", Уладзімір Казлоў з дзіцячага садка №8 і яшчэ група вучняў пачатковай школы №1 - Дар'я Клімашонок і Станіслаў Ліпень, Аліна Хадаронак і Ілья Міхайлоўскі, Яўгенія Шпак.

- Поспех гэтых дзяцей цалкам заслужаны, - падкрэслівае Ала Сяргееўна, - бо ў некаторых, нягледзячы на малы ўзрост, ужо маецца пэўны вопыт даследаванняў, ды і настаўнікі шчодра адораны здольнасцю настройваць вучняў лагічна разважаць і думаць, рабіць высновы і адстойваць свае меркаванні.

Словы Алы Петруковіч пацвярджаюць тэмы, якія выбраны для даследаванняў. Так, Давід Смалякоў высвятляў, ці могуць цені рухацца, Ульяну Богнат цікавіла, чаму ў труса доўгія вушы, а Уладзіміра Казлова - адкуль бяруцца лужыны і куды яны знікаюць? Ды і вучні пачатковай школы ўразілі глыбінёй і работай з рознымі дакументамі. Так, Аліна Хадаронак і Ілья Міхайлоўскі сваё даследаванне прысвяцілі Году гістарычнай памяці, калі сабралі звесткі аб воінах- афганцах у сваёй рабоце "Ведаць, каб памятаць". Сакрэт дубовых яблыкаў разгадвалі Дар'я Клімашонак і Станіслаў Ліпень. Ды і якая цікавая назва ў работы Яўгеніі Шпак "Гары, гары, мая свечка".

- Шчыра віншую дзяцей і педагогаў з нашым першым значным прарывам у даследчых работах, - гаворыць Ала Сяргееўна, - пераканана, што мы на правільным шляху да будучых вяршынь.

Яўгенія Шпак

Аліна Хадаронак і Ілья Міхайлоўскі

Давід Смалякоў

Уладзімір Казлоў

 Ульяна Богнат

Мілана ТРАПЯНОК.
Фота Алены ГРОМАВАЙ.